【Now財經台】近期食品及飲品類內需股表現唔錯，東鵬飲料(09980)股價今日(28日)一度大升近8%，高見118.4元，不過，有大行指，白糖、聚對苯二甲酸乙二醇酯(PET)樽等原材料成本上升，對公司毛利率及業績都有影響，睇埋大行就東鵬、農夫山泉(09633)、康師傅控股(00322)、中國旺旺(00151)等出嘅報告，都見到有唔同程度嘅影響，食品及飲品類股份係咪揀唔過？
天風國際李偉傑指，主要留意品牌效應及公司上市時間，東鵬主要走健康飲料路線，集團喺世界盃期間都有搵球星做代言人，喺現時追求健康或運動嘅大環境下，東鵬會較受惠，不過，公司今年2月初喺香港上市，所以市場仍觀望緊業績反唔反映到呢個利好因素。
Jason續指，雖然依家資金回流食品股，但東鵬之後要面對8月初基石投資者「解禁」問題，或要等業績表現持續理想，投資者先買得安心。佢又話，股價今日只係自低位反彈，仍未突破120元水平，要留意未來會唔會有大股東減持、配股消息。
