【Now財經台】金沙中國(01928)今朝(23日)出咗第2季業績，表現差過預期，期內，經調整物業EBITDA按年跌24%至4.3億美元，係疫情以嚟表現最差嘅一季，不過，金沙博彩下注額增長顯著超越整體市場，同去年同期比較，所有業務分部博彩下注額都錄得強勁增長，點睇金沙呢份季績，收唔收貨？
耀才證券研究部總監植耀輝認為，金沙呢份季績差過預期，首先高端博彩贏率異常偏低，其次係賭收增速放慢。此外，睇返過往舉行世界盃期間，賭股業績都比較差，今年都唔例外，亦拖累金沙上季業績，雖然大數麻麻，但睇返細分項，金沙中期增長其實跑贏市場，所以呢份業績都收貨。
Stanley又指，隨著世界盃閉幕，7月賭收理論上會有改善，又指第3季係關鍵，如果出現反彈，可以令市場對賭收睇法正面，相反，若數字較差，相信市場會對下半年及全年賭收持負面看法，繼而令賭股估值受影響，包括金沙。
