【Now財經台】7隻新股今日(9日)齊齊掛牌，包括「果鏈3巨頭」之一嘅立訊精密(02475)，但蘋果公司(Apple Inc.)呢個光環就幫唔到股價，今朝開市報63.25元，已失守招股價63.28元，其後更一度插穿60元，低見57.2元，低招股價近10%。H股定價本身已經較A股有折讓，但點解都吸引唔到資金之餘，首掛又要「潛水」？
耀才證券研究部總監植耀輝表示，通常首掛炒得好高嘅新股，超額認購去到幾千倍，但立訊精密超購唔夠3倍，意味基本上肯入飛抽都會中，反映市場對呢隻股份興趣唔大，加上立訊精密算大隻，值博率本身都唔係太高。
Stanley續指，其實股價表現同公司業務都有一定關係，投資者會睇股份有冇概念、規模、易唔易抽中，如果套用喺立訊精密上，其實情況比較尷尬，因為公司規模大，市場都預咗升幅有限，加上同Apple關係密切，同埋咁啱市場認為手機相關板塊前景有好大變數，因此，立訊精密首掛表現令人失望都無可厚非。
