【信報財經新聞】中東局勢急轉直下，美國與伊朗再爆發軍事衝突，侵侵更直言停戰告終，並威脅喺霍爾木茲海峽進行針對伊朗封鎖。歐美股市周三開市即插水，道指早段一度瀉逾800點，但納指跌超過1%後回穩。國際油價再急升，紐約期油一度急升8.01%，高見每桶76.08美元，收市報73.52美元仍漲4.37%，重返70美元之上，航空股插水。道指低開166點後，跌幅擴大至最多855點，挫至52069點，標指一度下滑1.09%，納指曾跌1.13%。俗稱「恐慌指數」嘅VIX波動指數一度抽高17.23%，達至18.91，其後升幅回順。美市收市，道指報52348，跌576點或1.09%；標指跌21點或0.28%，報7482；納指先跌後回升51點或0.2%，報25870。內存股反彈，費城半導體指數回升2.23%，報12574。不過，美伊局勢再度緊張，風險資產遭拋售，加密貨幣「一哥」比特幣曾跌3.64%，至61492美元。
睇返啲內存股，噚晚表現反覆，MU阿Man急住買咗一注928，結果盤前已隊穿900，888個買盤改到882，接近880條50MA應該有唔錯支持，結果就中埋另一注，平均價905元，結果盤中彈返上去，945元沽返半注出去短炒，然後再掛返個918再嚟，家陣短炒貨唔計已獲利部分嘅，平均價900左右，博佢守到條50MA後，有冇再彈埋去條5MA即975，甚至1000樓上挑戰20同30MA又可以有糊食。NVDA算勁，堅持住190-195呢啲係短炒上車位，噚晚股價上返200樓上，啱啱彈到去條30MA大約205左右，等多一等睇埋條50MA即210左右去唔去到。INTC掛咗喺102一路買唔到，暫時等下先，唔想太急又買返。DELL買返398確係靚位嚟，其實早段逼近450，呢一注有10%其可可以沽一半，但一時貪心無出手，收市暫時去返432，都叫做幾硬淨。啲內存股上返，MFST同META又腳軟，暫時兩隻都坐緊小小艇，不過中長線嚟講，呢兩隻都仲可以睇高少少。見MU生生猛猛，NVDA又守到個190，自然又望下隻愛股MRVL，50MA剛好係228，買返半注睇下有冇驚喜。暫時呢堆股份都係平整中，勤力少少炒下波幅，有助減低成個美股倉嘅持貨成本。
NQ噚晚夠晒波幅炒，用個29000至29100做個分水嶺，企咗29100就做好倉，去到29400左右見回頭就食糊，不過無反手淡倉，始終阿Man係美股大好友嚟。盤中兩次落到29100見支持就上車，29400見阻力，喺29350附近落車。估佢唔到今日喺亞洲時段上埋29500。暫時個NQ仍然喺29000-30000呢個範圍上落。今晚NQ分水嶺喺29500，支持29400/29300/29200/29100，阻力29600/29700/29800/29900。
港股昨日再度衝高，恒指高開44點見23541全日低後後維持升勢，午後一度升至24310高位，其後升勢回順，全日升702點近3%，報收24199，成交額則見3758億元。踏入7月份，港股持續反彈，在基金重新進行資產配置下，相對其他市場估值低廉嘅港股，獲資金抄底，資金從之前被熱捧嘅內存股，投向傳統科技股，其中阿里巴巴(09988)急升逾10%，ATMX等重磅股科技股，帶動大市衝上24000大關，並成功站穩20日線。雖然期指於夜期時段有所回落，一度重返23900水平之下，主要係美伊關係再度緊張，拖累美股急跌，夜期亦重返24000水平之下。不過今早亞太區股市又唔係太差，恒指低開18點，跌幅一度擴大至逾百點，低好友随即反攻，大市回升，最多倒升154點，高見24353，不過A股腳軟，又拖住港股後腿，臨近中午跌勢再擴大至最多210點，低見23988；半日挨近低位收市，報24011，跌188點或0.78%。大市半日成交2040.7億元，北水淨流入100.55億元，掃貨積極咗。
經過幾日急升，港股回調一下都合理，回調先以24000心理關口為首個支持，而下方20日線約23750為短線較重要支持。留意為內存股開始反彈，或不利資金流向ATMX等傳統科技股，成為短線港股調整理由。日韓股市回升，內存股大幅反彈，或誘導資金再流向相關新興AI股份，ATMJ等傳統科技股，於短線極度超買下或見回吐或整固，配合恒指或回踩20日線亦為5周線所在。即使恒指回踩20MA，能守於其上，料後市仍有條件往上重返30日線約24250-24300，站穩再挑一步挑戰50日線約25000水平，亦為日線保力加通道頂部約25072。
麥狄文
(徐狄怡‧證監會持牌人)
