【Now財經台】過去1個月，建滔積層板(01888)及母公司建滔集團(00148)股價，分別自高位回落約35%及約45%，花旗最新上調建滔目標價，由120元升至130元，維持「買入」評級，主要係印刷電路板(PCB)主要基礎材料覆銅板、電子布及銅等材料，加價幅度超預期，而今年已6度加價，究竟市場現時係咪一面倒認為硬件供應商會繼續加價，進一步加注相關股份？還是會擔心上游頂唔住，最終要將成本轉嫁予消費者，繼而影響上游嘅需求？
元宇證券大中華區股票投資總監趙晞文認為，唔會咁快影響終端對上游嘅需求，只係之前股價、估值一定程度上已計及嚟緊產品加價、需求拉動、產能偏緊等潛在趨化劑。
佢又話，雖然加幅超預期，但因為整個人工智能(AI)產業鏈驚喜度稍微降溫，所以，市場對相對利好消息會視而不見，短期著眼點會落喺預期7月底發嘅盈喜，會唔會遠超市場預期，如果冇超出預期，或成為沽貨藉口，短期嚟講會對估值造成一定擠壓。
