【Now財經台】截至早上11時止，過去1小時內《彭博》用戶搜尋量最多港股，依次為快手(01024)、壁仞科技(06082)、濰柴動力(02338)、建滔積層板(01888)及騰訊控股(00700)。
印刷電路板(PCB)相關股今日(6日)集體急挫，其中，建滔積層板一度瀉逾18%，低見69元，自上周Meta擬賣算力引發市場對人工智能(AI)投資過剩憂慮，到今次Token定價權下降問題，投資者係咪要開始警惕AI上游產業鏈炒過龍？
富昌證券聯席董事譚朗蔚認為，睇返相對強弱指數(RSI)，明顯睇到呢個板塊之前炒過龍，所以依家回套返部分升幅。佢又話，雖然Token支付價格指數已自5月高位回調20%，但建滔積層板及其他相關板塊，都係近10個交易日先開始回調，因此，兩者唔存在因果關係，唔係股價急挫嘅原因，佢認為，當市場要重新洗估值，任何因素都有機會利淡股份。
譚朗蔚續稱，由於PCB板塊未調整完，但股價亦未見頂，提醒依家仍有貨嘅投資者，可以留意股價會唔會上返80元水平，確認脫險回升，相反，若後市進一步跌至60元水平，就要及時止蝕。
