【Now財經台】人工智能(AI)相關股今日爆股災，多隻股份上市半年禁售期屆滿，其中，壁仞科技(06082)今日(2日)「解禁」，股價一度暴跌21%，低見48元，呢類股份過去一段時間其實升咗唔少，投資者係咪趁「解禁」沽貨，繼而拖冧股價？後市應該點部署？
耀才證券研究部總監植耀輝指，個別AI相關股真係升得好誇張，升咗逾20倍，所以投資者減持都好正常，呢類股份嘅業務性質同AI有密切關係，而市場正熱炒呢啲概念，不過，喺愈升愈多嘅同時，市場亦開始擔心公司業績跟唔跟得上，所以過咗禁售期之後，股東清倉嘅機會都幾大。
Stanley又話，雖然多隻相關股份嘅股價，已自高位回落咗唔少，但同招股價比較仲有好大段距離，所以個別一過咗禁售期，沽壓會比較明顯。不過，市場仍睇好有盈利嘅公司，其中，智譜(02513)可以睇高一線，雖然股價「腰斬」，亦傳出減持及配股等負面消息，佢建議不妨等呢啲消息消化咗，再睇下都未遲。
