【Now財經台】截至早上11時止，過去1小時內《彭博》用戶搜尋量最多港股，依次為康方生物(09926)、智譜(02513)、中芯國際(00981)、友邦保險(01299)及快手(01024)。
康方生物今日(17日)跑輸同業，逆市跌之餘，更失守50天線。集團旗下依沃西一線治療晚期鱗狀非小細胞肺癌新藥，喺內地上市申請上周獲批，但點解今日股價仍跑輸同行？
富昌證券聯席董事譚朗蔚指，過去一兩個月，整體生物科技及創新藥股強勢，原因係個別公司研發方面有好大突破，甚至開始「出海」，帶動收入創新高，支撐整體板塊表現，康方落後主要係全年業績繼續「見紅」，虧損擴大至11億人仔，導致股價非常弱勢。佢又話，即使股價借新藥品研發反彈，但每次都受制於105元水平。
佢又提醒，就算板塊當炒都要小心揀股，如果康方有貨就睇下守唔守得住91元水平，冇貨就宜揀強勢醫藥股。
