【Now財經台】日前，據外電報道，美的集團(00300)正籌備分拆旗下德國工業機械人業務庫卡(KUKA)，明年喺內地上市，估值或高達1750億人仔，相當於美的市值5720億元逾30%，呢嘅舉動係咪對提升美的估值有好處？
艾德金融執行董事陳政深指，家電股喺A股及H股平均市盈率(PE)約8倍至13倍，現時美的PE約12倍，屬行業偏高水平，但仍算合理，而呢個估值喺基於集團係一隻家電股。
Ryan又指，美的去年逾4500億人仔收入中，有近1228億人仔來自B2B業務，該業務佔比約30%，增長達17.5%，明顯快過整體嘅約5.5%，即投資者用家電股估值，就可以買1隻有齊家電、機械人及B2B概念嘅股份。
佢續指，美的相對機械人或相關類別股份嘅市銷率(PS)偏低，所以有消息指公司想分拆相關業務，如果成功上市，呢瓣業務嘅價值就可以釋放返出嚟，令美的成盤數可以重新估值，到時PE肯定唔止12倍，給予股價增長空間，呢個就係美的同其他家電股嘅分別。
