【Now財經台】美的集團(00300)昨日(30日)出咗業績，雖然去年第4季賺少咗，但股價今日(31日)一度大升近8%，高見84.55元，值得留意係，集團息率升至逾5厘，股價今日升得咁靚係咪同息率有關？集團又計劃動用唔超過130億元回購A股，呢個動作又有咩啟示？
富途證券高級分析師馮文慧表示，美的去年第4季盈利放緩，主要受「以舊換新」政策影響，但喺內房持續疲弱下，美的業績已經算唔錯，派息亦相對吸引，含金量高，喺波動市況下，高息股喺長期資金停泊嘅理想選擇。
佢又話，美的股價其實跌咗好多，但出完業績後，見到喺低位有明顯支持，反映資金對集團派息加碼比較積極，加上公司喺行業前景唔明朗下，仍增加派息回饋股東，反映手頭資金相對充裕。
Anna又話，美的擬掟過百億回購A股，反映公司認為現價反映唔到股份真正價值，由於睇好前景，所以就加大回購力度，希望收窄AH股溢價，現時美的市盈率(PE)約12倍，屬於歷史低位，加上業績穩健增長，又增加派息及回購，所以仍有一定吸引力，相信會係中長線資金重點吸納對象。
