【Now財經台】巨無霸新股SpaceX昨日(15日)上市第2日，股價繼續衝高，再升近20%，收報192.5美元，現時有3家機構給予SpaceX評級，目標價就分別睇115美元、175美元及190美元，但已經全部到價，現價高追仲有幾多水位？
iFast Global Markets副總裁溫鋼城指，佢對SpaceX嘅目標價睇180美元左右，公司仲未有錢賺，純粹睇市銷率(PS)高逾90倍，係破紀錄嘅離譜水平，相比之下，當年同樣係明星新股嘅Facebook及阿里巴巴(09988)都冇咁誇張，SpaceX依家靠多項業務支持估值，包括太空飛船、Starlink(星鏈)及xAI，仲有太空數據中心、喺太空獲取太陽能等，主要係賣算力，集團預期，AI收入相當於「飛船+Starlink」嘅12倍，但最後係咪可以實現仍然係未知數。
佢又話，馬斯克(Elon Musk)最叻賣夢想，SpaceX可以話係「信仰股」，上市時投資者爭相出貨，反映市場本身都有啲保留，雖然公司未來有機會成功，但失敗風險亦唔細，所以策略上炒下好過長揸，短炒到8月左右已經差唔到。
