【Now財經台】周大福(01929)昨日(11日)出完業績後，股價今日(12日)勁升逾18%，高見13.2元，其後升幅略為收窄。周大福全年收入按年增長5%，純利按年增長逾50%至90億元，超預期，毛利率升至32.3%，毛利率改善係咪導致收入增長唔大，但純利有明顯升幅嘅關鍵？
王道資本及家族資產管理執行董事黃敏碩表示，純利升幅較收入高一大截，係因為集團高端項目、成本控制做得比較好，加上內地業務較集中，純利可觀亦反映內地高消費意欲增加，而末期及全年派息都加碼，都係股價今日大升嘅推手。
Michael又話，周大福產品組合多咗「一口價」金飾，高端門店數量又多咗，都會帶動到毛利率上升，加上周大福開始改變銷售策略，就係順應潮流同不同IP合作，擴闊產品鏈之餘，又可以吸引更多年輕顧客，而年輕客群消費力絕對不容忽視，因為同樣可以帶動到毛利率。
