【Now財經台】截至早上11時止，過去1小時內《彭博》用戶搜尋量最多港股，依次為聯想集團(00992)、地平線機器人(09660)、泡泡瑪特(09992)、碧桂園(02007)及信達生物(01801)。
美國伺服器製造商戴爾(Dell)昨晚(28日)出咗上季業績，遠勝市場預期，刺激股價喺美股昨晚收市後延長交易時段狂飆40%，更帶挈近期強勢嘅聯想，聯想股價今日(29日)大幅高開近15%，其後升幅一度擴大至逾30%，高見25.7元，創新高，其實聯想炒Dell利好因素已經炒咗幾日，今日再裂口大升，到底反映晒未？
大華繼顯執行董事梁偉源指，受業績帶動，聯想股價呢幾日股價已翻倍，相信升幅已反映大部分利好因素，但因為Dell業績超靚，加上2027指引樂觀，同埋業績喺美股昨晚收市後公布，投資者想追都追唔到咁多，因此，今日有部分資金轉追入聯想。
Steven續指，人工智能(AI)發展令基建、伺服器及電腦投資前景愈來愈樂觀，如果Dell股價繼續升，聯想都會跟住升。
