【Now財經台】特海國際(09658)主要喺海外市場經營海底撈(06862)品牌火鍋店，集團昨日(20日)派咗第1季度成績表，收入按年增長逾14%至2.26億美元，但純利按年大跌近66%，主要受成本增加拖累，因為原材料及租金等全線上升，再加埋錄得1170萬美元匯兌虧損。不過，特海股價今日(21日)一度大升近10%，其後跌幅顯著收窄，點解股價今日反應咁正面？
艾德金融執行董事陳政深指，市場似乎唔太介意呢份業績，收入有得升反映基本面冇問題，生意亦唔係差咗，純利大跌純粹受成本上升及匯兌虧損拖累。佢又話，反而市場聚焦特海經營層面有冇改善，經營溢利及經營溢利率都有得升，反映核心營運效率明顯改善，更顯示業務質素有所提升。
Ryan又話，特海股價今日向上，反映投資者睇好公司前景，亦明白純利下跌只係短期受成本因素影響。
