【Now財經台】截至早上11時止，過去1小時內《彭博》用戶搜尋量最多港股，依次為美團 (03690)、經緯天地(02477)、兩倍南方海力士(07709)、舜宇光學科技(02382)及騰訊控股(00700)。
晶片股、硬體股繼續熱炒，科網龍頭方面，美團今朝(21日)一度升近5%，其後升幅不斷收窄至約升1%，騰訊曾升1%，但之後掉頭向下，而阿里巴巴(09988)今日都受壓，係咪反映投資者唔太睇好「ATM」？
香港股票分析師協會副主席曾永堅指，市場將「ATM」定位為舊科技股，現時市場焦點集中喺人工智能(AI)產業相關股，雖然騰訊近年積極發展AI大模型應用，但主業及現金流都喺遊戲業務，所以唔係短線炒作重點。不過，騰訊內地及海外遊戲市場可帶嚟穩定現金流，而相關增長足以支持預測市盈率(PE)，所以股價喺430元水平有頗大支持。
美團方面，Jaseper指出，市場估計，集團今年第1季虧損將會收窄，加上美團向高消費力客戶群提供補貼，反觀競爭對手餓了麽、京東外賣，4月、5月提供嘅補貼少咗，令美團有一個喘息空間，佢估計，美團公布季績前，股價喺80元水平。
