【Now財經台】人工智能(AI)半新股近期愈炒愈癲，呢啲股份大部分喺去年底至今年初來港上市，基石投資者半年禁售期將陸續屆滿，「解禁潮」將會係股價一大考驗，呢批限售股6月至9月就會迎來「解禁」高峰，包括近期狂飆嘅壁仞科技(06082)、天數智芯(09903)、智譜(02513)、稀宇科技(MiniMax)(00100)、兆易創新(03986)、瀾起科技(06809)。機構投資者都有好大獲利誘因，有貨冇貨應該點部署？
華晉證券資產管理投資總監馮宏遠認為，基投一定會沽貨，又話年初時已提醒如果好幸運喺IPO抽中持有就算，唔係話首掛大升就沽，但上市後水位會相對少，反而硬件相關股如壁仞科技，真係可以用一個進取嘅估值，上市後仍可以繼續升。
佢又話，如果喺依家諗住買呢啲股份，望下日韓台呢類股份，其實大家都只係睇個睇字，大家都唔敢買，所以都係同樣原理，佢唔認為去買呢啲AI半新股，所需要嘅勇氣比買SK海力士(SK hynix Inc.)或美股相關股等小。
