【Now財經台】截至早上11時止，過去1小時內《彭博》搜尋量最多港股，依次為智譜(02513)、紫金礦業(02899)、洛陽鉬業(03993)、MiniMax(00100)、小米集團(01810)。
智譜股價過去7個交易日飆逾90%，今日(23日)顯著回套，一度瀉近18%，低見1980元，股價連日炒上，主要受惠於新發表嘅GLM5.2模型市場反應好，不過，《彭博》綜合分析員比嘅目標價大約係1300元，雖然摩根大通昨日(22日)上調目標價30%至1800元，都已經到晒價，智譜係咪炒到過晒龍？
復星國際資產管理投資經理李曉翀指，智譜解禁時間開始倒數，之前總市值最高炒到逾1萬億元，但睇返條數，預計2030年，內地To B嘅人工智能(AI)大模型嘅總收入規模約係2萬億元，智譜市佔率約10%，即收入2000億元，比5倍市銷率(PS)計，都只係1萬億元，上次業績提及嘅年度經常性收入(ARR)有10億美元，估值比起Anthropic或OpenAI都太誇張，反映係炒過龍。
佢又話，公司一係就喺中期業績推高ARR比例，依家喺市場有限度流通量嘅情況下，都係交易性操作為主，後市要喺營運數據上比到市場信心，以至推升到ARR比例。
