【Now財經台】人工智能(AI)熱潮愈演愈烈，其中，創科實業(00669)受惠於數據中心建設亦成熱炒對象，股價今日(7日)一度勁升近11%，高見126.9元，摩根大通發報告指，創科是AI數據中心建設中，產業鏈不可或缺嘅一員，點睇細摩嘅分析？
艾德金融執行董事陳政深指，創科本身喺電動工具及戶外電器供應商有領先地位，品牌定位較高端，依家數據中心建設需求大，要求亦好高，今次摩通份報告冇提及創科要全面轉型做AI股，只係話喺電網基建、數據中心之中，呢類高級電動工具係核心一環。
Ryan又話，數據中心配套才是技術所在，因為涉及高壓電、重型機電，加上長周期嘅維護工程，而旗下品牌Milwaukee被大型承建商Quanta指定協助興建數據中心，相信係對創科嘅肯定。
股價方面，創科股價會唔會出現突破要睇兩樣嘢，首先係AI數據中心定單，係咪可以更實在喺業績反映，繼而說服市場，其次係宏觀利率及港股氣氛配合，依家港股氣氛唔差，只係重磅股拖累咗指數，佢又認為，喺呢個情況下，創科股價好大機會可以向上突破。
