【Now財經台】截至早上11時止，過去1小時內《彭博》搜尋量最多港股，依次為小米集團(01810)、濰柴動力(02338)、恒基地產(00012)、康方生物(09926)、及MiniMax (00100)。
小米股價今日(4日)一度勁升10%，高見32.14元，旗下小米汽車4月交付量逾3萬架，按年增長約7%，按月更大升近50%，增速係今年最快。此外，全新車型小米YU7 GT月底就會正式登場，有分析指，集團產品線會由純電轎車，延伸至高性能SUV市場，進一步推動全年交付量，今年目標係55萬輛車，呢啲消息可唔可加強市場對月底出爐嘅業績信心？
富昌證券聯席董事譚朗蔚認為，小米股價升勢應該同新車有關，為股價創造一個反彈契機，但提醒投資者唔好對新產品有過分憧憬，事實上，小米嘅汽車毛利較低，佢再提醒，小米依家只係一個跌浪反彈，有機會彈上33元水平，但一日未明確企穩，相信呢浸反彈都有限，又認為現時唔係買入時機。
Stevan又指，小米主業係手機製造及銷售，但佢不斷將本業嘅盈利投入到新業務，例如汽車及晶片等，所以就算小米主業有增長，亦未必夠填佢新業務虧蝕個氹，所以整體盈利未必會令市場有好大驚喜，建議投資者投資小米要審慎。
