【Now財經台】騰訊控股(00700)股價今朝(30日)低開約1%後，跌幅不斷擴大，一度低見465.4元，挫2.8%，跌至逾1年低位。騰訊CALL及牛證槓桿都吸引，好多熱門CALL今年6月至10月到期，槓桿4倍至12倍，不過，股價似乎仲尋緊底，時間值損耗會唔會太大？牛證係咪更值博？
中信證券國際股權衍生品銷售經理李碧珊指，最近騰訊係資金流焦點，昨日(29日)流入逾5000萬元資金，係近1年最多，反映投資者認為騰訊現水平值博。佢又指，過去1個月，騰訊好倉資金流有60%流入牛證，好處係近乎冇時間值損耗，仲可以做到高槓桿，現時牛證重貨區喺450元水平，槓桿18倍至逾20倍。
Percy又話，因為CALL輪冇收回風險，加上今早恒生指數波幅指數(VHSI)跌穿20水平，跌至1個月低位，騰訊3個月期權引伸波幅喺2個月低位徘徊，因此，唔少投資者都部署CALL，想賺窩又賺價。此外，騰訊5月就會出業績，價外20%，8月至9月到期，實際槓桿約10倍，係較受歡迎CALL。
