【Now財經台】吉利汽車(00175)今日(29日)中午派咗首季成績表，期內總銷量按年增長1%至逾70.9萬部，多過內地電動車「一哥」比亞迪股份(01211)約9000部，純利按年跌逾26%，收入就按年增長15%。吉利股價午後一度高見22.94元，升逾5%，股價放榜後抽高，係咪反映市場都收貨？
方德證券高級分析師莫灝楠表示，主要同銷量持續上升及海外收入有關，喺香港好多老細車都係極氪(Zeekr)呢個型號，證明喺本港曝光率及銷量唔錯，亦反映出口銷售唔差。
佢又話，之前內地汽車市場「內捲」情況嚴重，吉利及比亞迪一齊出平價車，平至幾萬蚊人仔已經可以做車主，不過，依家價格戰冇進一步白熱化，因為已經好差。莫灝楠認為，呢個時候見到電動車厰仲有毛利，銷量亦透過其他途徑創新高，已經比投資者想像中明朗。
