【Now財經台】德昌電機(00179)昨日(21日)收市後發盈警，預期全年純利最多跌25%，德昌股價今日(22日)大插水，一度重挫18%，低見20.94元，係咪呢個盈警令市場好失望？
元宇證券投資總監林嘉麒指，德昌繼續有下行風險，今次盈警嘅訊息好詳細，但未知集團有冇方法解決箇中問題，甚至每個環節解決一兩個問題都未必做到，可能未來要做更多嘢先可以令投資者有返信心，讓投資者判斷仲有冇中長線投資價值。
KK又話，今次盈警同機械人業務條數冇關，睇返啲數字，尤其下半年，相對上半年有好大變化，睇返基本面，汽車業務做得差，行業「內捲」情況比預期嚴重，至於機械人發展就要等出全年業績時，先可以睇到未來嘅發展計劃。
股價方面，因為市場之前熱炒機械人概念股，所以拉高咗德昌估值，但畀公司基本面、核心業務做得差拖累返，短線要小心因為市場憧憬有少少落空，股價有機會落到18元水平，但到時估值先算合理。
