【Now財經台】德昌電機控股(00179)股價今日(27日)一度飆近22%，高見32.24元，亦有大成交配合，但其實公司冇傳出重大利好消息，早前春晚嘅機械人表演，帶挈相關概念股炒多轉，但德昌當時冇乜反應，點睇股價今日突然「開車」？
富途證券首席分析師譚智樂指，依家炒「影子股」可以話係氣氛到位，對呢類估值平，又有概念嘅股份再炒上唔意外，市場依家估緊德昌會唔會轉型，尤其喺多新股上市、春晚效應下，德昌相關零部件有機會可以滲透入行業當中。
Arnold又話，德昌係一隻典型情緒交易股份，雖然有條件轉型，但相信要喺研發方面進行投資，等時機成熟後再發布消息，但佢認為，「空穴來風，未必無因」，市場依家有呢種諗法，唔可以抺殺佢同機械人嘅可行性，所以短線跟隨市場情緒炒，亦係高風險高回報。
