【now.com財經】唔少內地旅客及港人鍾意去掃貨，本地最大連鎖藥妝零售商龍豐集團，市傳最快下個月喺香港上市，集資1億美元，折合約7.8億港元。
據《IFR》報道，龍豐已經喺去年底向港交所(00388)遞咗上市申請，值得留意係，集團今次上市由星展亞洲融資做獨家保薦人。
據招股書顯示，集團去年賺1.7億元，按年增長近18%，總收入逾24億元，2023年至2025年間複合年增長率50%。
睇返同行莎莎國際(00178)及卓悅控股(00653)過去1年股價表現，分別累升約40%及累跌逾30%，如果再睇遠啲，過去5年，股價就分別累跌逾50%及逾90%，唔知同業表現會唔會令散戶入飛時會更小心。
