【Now財經台】相隔7年，領展房產基金(00823)再次出售非核心資產，股價今日(9日)一度升2%，高見38.58元，午後升幅收窄，更一度輕微倒跌，股價走勢係咪反映市場唔係好Buy呢單Deal？
耀才證券研究部總監植耀輝指，市場又唔會唔滿意呢單交易，只係早段市場對呢個消息有少少過度亢奮，今次出售價較當年買入價有幾大溢價，持貨咁短時間就有咁理想回報，其實係一單唔錯嘅Deal，不過，雖然呢單交易相對於領展嘅規模，佔比其實好細，佔總資產約0.7%，所以對領展嘅資產淨值貢獻唔大，相信可以解釋今日嘅股價走勢。
Stanley又話，同疫情前2017、2018當年出售資產比較，相信當年唔係太睇好資產帶來嘅潛在回報，變相將較一般嘅資產，以一個唔錯嘅價格出售，依家要再賣資產較難有一個靚價。
佢續指，領展呢個新加坡商場本身唔係無賣點，人流多又鄰近地鐵，發展潛力唔差，價格又吸引，即使持貨期唔長都可以有豐厚回報，相信依家冇咩資產可以做到呢個效果。
