【Now財經台】截至早上11時止，1小時內《彭博》用戶搜尋量最多港股，依次為極兔速遞(01519)、翰森製藥(03692)、藥明生物(02269)、中國銀行(03988)及舜宇光學科技(02382)。
舜宇昨日(30日)交咗一份靚成績表，去年多賺72%，符合盈喜預期，毛利率亦回升至19.7%，重返2022年水平，主要受惠於手機鏡頭規格高端化，同埋高毛利汽車產品佔比提升，舜宇股價今日(31日)一度升逾4%，高見55.5元，可唔可以話股價已開始轉勢？
富途證券首席分析師譚智樂指，舜宇盈利能力較市場預期強，但唔代表股價已轉勢，股價反彈有可能係市場之前睇得太悲觀，雖然高端化產品保住毛利率，但未來兩年手機出貨量仍面對好大壓力，加上集團喺汽車核心需求，例如車載激光雷達等產品參與度都唔算太高。
Arnold又話，睇返技術走勢，舜宇股價要重上20天線，即55元樓上，先可以初步確認轉勢，依家市場仍持半信半疑嘅態度，舜宇依家最大吸引力係估值，現時市盈率(PE)約15倍，雖然有短線資金博反彈，但未必會太快確認轉勢，估計短期會喺52至55元波動，投資者不宜過分樂觀。
