【Now財經台】康方生物(09926)昨日(26日)出完業績後，股價今日(27日)早段一度受壓，但之後拗腰向上，點睇公司前景？
富途證券首席分析師譚智樂表示，雖然康方放榜後，股價今早一度向下，但投資者唔應該單睇短線波動，唔係「升就好，跌就差」，睇返技術走勢，康方表現其實同整體生物科技指數差唔多，亦同大市「破腳穿頭」走勢相若，反映今日早段跌勢主要受整體市場氣氛較差拖累，而唔係受公司個別因素影響。
投資部署方面，Arnold建議，可以留意生物科技交易所買賣基金(ETF)，生物科技行業最大嘅風險係要考慮產品會唔會出事，而對冲風險最好嘅方法，就係避免投資單一股份。
佢解釋，ETF嘅好處在於分散投資，一旦個別公司出事，可以透過分散持倉減低個股風險，由於生物科技板塊個股風險相對大，所以考慮投資ETF，因為會較穩妥。
