【信報財經新聞】市場憧憬美國能夠透過外交方式促成與伊朗停火，國際油價大幅回落，帶動美股周三顯著反彈。道指高開190點後，升幅擴大至最多594點，高見46718，收市道指升304點或0.66%，報46428；標指升35點或0.54%，報6591；納指升167點或0.77%，報21929。
可惜，伊朗表示未能同意談判協議內容，今早亞洲時段更有消息指伊朗塔斯尼姆通訊社報道，伊朗議會正制定一項對霍爾木茲海峽通行船隻，徵收費用嘅法律草案，草案預計下周完成修訂後提交議會審議。呢個消息又刺激紐油期油重返90美元之上，令今朝亞太區股市再度走軟。雖然油價長期高企，將拖累經濟增長，但高盛表示，近日亞太區股市嘅跌幅，已反映石油衝擊嘅大部份影響。另一邊廂，巴克萊表示，儘管面對宏觀經濟風險、中東戰爭及人工智能(AI)顛覆風險，仍然將標指今年底目標由7400點上調至7650點，較周二約有16%潛在上升空間，理由係相信美國經濟增長繼續快過其他主要經濟體，以及科技帶來長期增長動力，目前未有停低跡象。摩根士丹利策略員Michael Wilson亦睇好標指企業未來12個月盈利增長20%，並指呢個係印證該行之前觀點，即今次國際石油價格飆升導致商業周期結束嘅可能性依然偏低。
美國10年期債息最多回落5.53個基點，至4.3045厘；對息口較敏感的兩年期債息降4.03個基點，至3.8484厘。美滙指數一度反覆倒升0.22%至99.65，日圓跌0.51%至159.51兌每美元。加密貨幣「一哥」比特幣一度攀高2.79%，至72013美元。券商Bernstein認為，比特幣已見底，隨着機構投資者參與度與日俱增，今年底有望升見15萬美元。不過其就睇暫時比特幣喺75000-80000美元阻力仍大，唔企穩返8萬美元，暫時BTC最多只係上落市格局，難言再展升浪。之前BTC掘起，唔少人講緊去美元化，美元地位將大大被削弱，但當美以攻打伊朗，中東局勢變得唔明朗嘅時候，除咗美元之外，幾乎所有資產，包括金同BTC都被洗倉式拋售，可見美元霸權地位未有改變，有起事上嚟，唔單止係cash is King，正確嚟講係USD is King。
伊朗就暫停戰火與美國談判提出五項條件，包括1)全面停止攻擊與暗殺行動；2)建立具體機制確保戰爭不再重演；3)明確支付戰爭賠償；4)結束區域內所有戰線與相關武裝組織衝突；5)以及承認伊朗對荷姆茲海峽的主權地位，並作為履約保障。暫時睇呢幾點，似乎第三點侵侵一定唔會同意，至於第五點呢，就要睇雙方嘅利益如何分配，伊朗要咁做嘅話，都要美國方面一齊有着數先得。基於呢個原因，估計場仗都無咁快停，唯一係侵侵定咗5月中訪華，市場估計5月左右應該會搞得掂，但即係仲有成個月，市場會繼續受中東局勢不明朗所困擾。噚晚NQ好明顯畀個24550頂死咗，今晚NQ個好淡分水嶺24300，支持24200/24100/24000，上方阻力24400/24500/24600，暫時都係咁先，正股方面繼續以防守為主，暫時TSM未出手，今晚再睇下乜嘢環境先。
雖然中東局勢有所緩和，但市場仍受持續戰事消息所影響，港股表現反覆，昨日恒生指數高開216點，一度升326點見25390高位，其後曾回軟倒跌48點，低見25015，其後重拾升勢，恒指收市升272點或1.08%，報收25335，成交額3509億元，回復暢旺。經過周一急跌後，港股連續反彈兩個交易日，暫時喘定，總算成功修復250日線約25100水平。預期短線港股表現仍反覆，除受戰事消息左右之外，仍有唔少重磅股公布業績，雖然已接近業績期尾聲，但今日輪到美團(03690)公布業績，留意會否影響市場氣氛。
噚日泡泡瑪特(09992)公布業績後，股價急跌逾兩成，主要係市場憂慮集團其他IP銷售未達預期，而管理層拋出維持增長僅兩成嘅指引，嚇退投資者，與過往以倍數增長嘅業績相比，兩成增長嘅業績指引，實在係趕客。不過經過兩日急跌三成，今早去過150.2低位，剛好到咗條100周線，加上經調整後PE得返12倍左右，估值已重返合理水平，呢啲位博下反彈，下面個防守位146-147，大約較現價低5%左右，又唔係無得博，短線超賣博彈反去160/167先，至於要上返174-180似乎就要時間，174-180應該會變阻力。
至於今日美團公布業績，市場已有心理準備唔會好，不過昨日內地官方媒體發表評論《外賣大戰該結束了》嘅評論文章，有關文章更獲得市監總局轉發；被市場視為外賣市場內捲將告一段落。一直處於捱打狀況，被侵食市場份額嘅美團，料可受惠外賣市場內捲結束，其股價已跌至一個估值較低水平，有望因此估計重評，吸引投資者再掃貨，股價被推高一成後，觸發沽空盤冚倉，令股價進一步被推升。今後美團股價表現如何，相信作要靠未來業績去決定，暫時唔建議盲目追貨，都係等埋業績再作定奪，尤其唔少重磅股即使業績表現唔差，股價不升反跌，近日嘅騰訊(00700)、阿里巴巴(09988)仲有快手(01024)都係績後股價下跌，呢一點值得留意。
港股目前仍未完全脫險，更遑論扭轉跌勢；恒指至少要重返20日線即25600水平之上，方能突破由1月高位延伸至今嘅下降軌頂部，扭轉跌勢。如要重拾升勢，則要重返所有平均線之上，即包括50日線約26400水平，方有條係再向上挑戰二萬七。短線大市較大支持約為周一低位24200，短線支持則為5日線約25100水平，下個支持為24800-24900短線密集區，穿咗24800就真係要小心，調整之中反彈完成，分分鐘外圍有乜嘢壞消息，再落多去一次下面做個雙底。至於最近一個阻力為20日線即25650，較大阻力為25800-25900過去三個月嘅大型密集區。
麥狄文
(徐狄怡‧證監會持牌人)
