【Now財經台】截至早上11時止，1小時內《彭博》搜尋量最多港股，依次為老鋪黃金(06181)、恒基地產(00012)、友邦保險(01299)、康師博控股(00322)及泡泡瑪特(09992)。
老鋪黃金昨日(23日)派咗一份好靚仔嘅成績表，去年純利及收入都按年勁升逾2倍，公司又預告今季收入最多175億人仔，刺激今日(24日)股價一度大升逾10%，但預測市盈率(PE)只得約13倍，後市點睇？
高歌證券金融首席分析師聶振邦認為，老鋪黃金呢份業績有一定吸引力，但股價由今年1月高位近900元大幅回落，依家啱啱上返600元水平，反映投資者入市態度審慎，有機會係因為金價不確定性，同埋內地及本港零售市道仍然疲弱，由於利好消息已反映得七七八八，所以上望目標宜保守啲，暫定650元水平，相信要等港股整體氣氛好轉，先至有望展開更強勁嘅升浪。
聶Sir又指，若金價回落，要留意集團呢段時間會唔會進取啲入貨，帶動毛利率向上。佢續指，雖然老鋪黃金去年業績唔錯，但去年上半年增速比下半年快，所以要留意今年上半年增長有放緩風險。
