【信報財經新聞】上周五美股表現反覆，美國第四季經濟增長向下修訂帶動債息回落，道指一度升446點，但特朗普預告美軍本周將猛烈空襲伊朗，道指反覆回落183點，收市仍跌119點，報收46558；標指回吐40點或0.61%，報收6632；納指跌206點或0.93%，報收22105。美國「科技七雄」指數跌1.56%，較去年10月29日所創收市歷史最高位跌11.63%，技術上陷入調整區。
特朗普亦表示如果需要美軍將護送油輪通過霍爾木茲海峽，油輪亦要「拿出點膽量」通過霍爾木茲海峽；特朗普亦喺G7領導人視像會議上吹噓伊朗即將投降，但事實上伊朗政權未有即將投降或崩潰跡象。另一方面，法國及多個歐洲國家據報與伊朗展開談判，尋求達成協議以確保其船隻安全通過霍爾木茲海峽。油價高企下，本周美國聯儲局議息料維持息口不變，而高盛基於預期通脹高企，將聯儲局恢復減息時間，由原先6月押後到9月除咗美國聯儲局之外，本周迎來多國央行議息，包括日本央行、澳洲央行、加拿大央行均會喺周內公布議息結果，料將牽動金融市場走勢。其中，投資者關注油價上漲後會否加劇美國通脹升溫預期，繼而迫使聯儲局要更長時間凍息，如通脹回升，甚至或要加息應對。
至於美股今日喺亞洲時段，道指期貨跟NQ都反彈，睇返上周五盤後，唔少科技股都反彈，阿Man投資組合及觀察名單嘅股份，包括RDW、ONDS、NVDA、GOOGL、CRWV等等，暫時喺今次美股反覆市況中，一直都守支持位。而上周五見到META跌咗超過4%，又到600-615呢啲支持位，正考慮撈唔撈貨，但盤後已彈返上620美元樓上，今日等盤前開市再望下有無機會喺615-618呢啲位上車，短用600-610做防守，上面反彈目標係630-660。NQ今晚分水嶺24700，上方阻力重重，24800/24900分別係10日線同20日線，而10周線大約喺25065，上面個個位都擋得吓，上周五已提到，NQ唔企返搵25000，暫時都難擺脫調整弱勢。至於下方支持仍然係24500/24300，重要支持當然係24000不容有失。
至於港股上周反覆偏軟，周一恒生指數曾跌850點至24906近7個月低位，為自去年8月首次跌穿25000關，周二顯著反彈，至周三曾升至26149高位，但即日倒跌，至周五以25465收市，按周跌292點或1.13%。周五晚夜期雖一度反彈至25700水平，但最終回落至25500水平之下收市，至今早黑期仍處於25500水平之上，主要因紐約期油價格並未有進一步升穿100美元。目前美伊戰爭並未有停戰跡象，估計油價仍會高企一段時間，不過各國已開始釋放戰略石油儲備，以遏止油價升勢。
恒生指數今早低開29點後，一度跌147點至25317半日低位，但A股低位反彈，港股則扭轉跌勢回升，高位一度升302點見25768；半日升289點或1.13%，報25755，重返10日線及5日線之上。國企指數升111點或1.28%，報8782；科指升111點或2.23%，報5089，逼近20日線約5100關，能否延續反彈升勢，科指要睇上唔上得返5100水平企穩。半日成交1434億元，成交又唔算特別多，以半日近300點升幅嚟講，只可以話勉強合格。
留意本周有多間重磅上市公司公布業績，包括騰訊(00700)、阿里巴巴(09988)及友邦(01299)等，如果呢幾隻重磅股業績表現及前景展望令市場滿意，睇下有冇機會帶動科指及恒指重上20日線，分別係5100同26130。留意恒指5日線升穿10日線，發出短期見底訊號，如大市能企穩10日線，即25500水平，或有利反彈。不過反彈上方卻面對重重阻力，首個阻力為25800，約10個月線；較大阻力為25900水平，為5周線所在，而26100-26150即20日線，及26200-26250約100日線阻力唔細。下方50周線約25150及250日線25060為短線支持，不容有失，否則港股將出現較深度調整。
短期美股仍受私有信貸問題惡化，美伊戰事等利淡因素困擾，而目前中美元首會面或存變數，暫未能確定習特會時間表。呢啲不確定因素令美股維持上落市格局，而港股暫時亦處於區間上落格局，本周恒指或於24800/25000至25800/26000水平之間上落。
麥狄文
(徐狄怡‧證監會持牌人)
