【Now財經台】依家有3隻新股招緊股，分別係廣合科技(01989)、國民技術(02701)以及飛速創新(03355)，其中，廣合科技係內地最大及全球第3大算力服務器印刷電路板PCB製造商，客戶包括戴爾(Dell)、惠普(HP)、聯想集團(00992)等。初步嚟睇，國民技術及飛速創新有冇賣點？投資者又可唔可以當廣合科技係人工智能(AI)算力基建股？
高歌證券金融首席分析師聶振邦表示，國民技術及飛速創新同廣合相比，會有比下去嘅情況。雖然國民技術已經喺A股上市，但暫時仲蝕緊錢，國民技術同廣合都屬於晶片相關產業，如果要二揀一，廣合似乎可以睇高一線。
至於飛速創新雖然有盈利基礎，但由於集團同汽車產業相關，依家汽車股唔係市場焦點，所以孖展認購反應相對冷淡。聶Sir認為，可以暫時唔理國民技術及飛速創新。
佢又話，廣合同唔少知名企業有合作，加上PCB用途相對廣泛，例如好多電子產品都要用PCB，業務前景可以睇高一線。
