【now.com財經】銀行股業績期殺到，其中，滙豐控股(00005)將會喺周三(25日)派全年成績表，除咗幾條大數外，小股東最關心當然係派息。
據滙控綜合多家券商平均預測，估計全年派息72美仙，意味第4次派息有望達42美仙，按年增逾16%，如果扣除前年派嘅特別息，全年派息增加9%，相信小股東都樂見。此外，有分析認為，滙控私有化恒生銀行後，由於後者手上有唔少Cash，可以畀滙控用嚟派息。
至於明日(24日)放榜嘅渣打集團(02888)，有分析認為，雖然股息率一直較輸蝕，但股價過去1年升咗唔少，相應反映賺錢能力比之前更強，相信喺派息方面好大機會「識做」，氹下小股東開心。
下月底先至出業績嘅中銀香港(02388)，一向係「食息一族」愛股之一，依家股息率仍高逾5厘，估計出業績時，派息方面都應該會有好消息。
