【Now財經台】本身喺A股上市嘅美格智能，周三(11日)已通過咗港交所(00388)上市聆訊，短期內可以開始招股。美格係深圳上市嘅無綫通訊模組及解決方案提供商，以高算力模組為核心，支持複雜算法及端側人工智能(AI)應用。近期高算力智能模組處於產業鏈中游，但似乎從事下游業務嘅公司較受投資者歡迎，點睇呢隻新股？
高歌證券金融首席分析師聶振邦指，下游業務對消費者及投資者嚟講，應用及接觸面都比較強，例如稀宇科技(MINIMAX)(00100)及智譜(02513)。佢又指，如果產業鏈偏向中游的確會有少少影響，但近期瀾起科技(06809)都升得唔錯，若美格智能上市時，AH股有明顯價差就會有吸引力。
聶Sir續指，依家美格智能市銷率(PS)偏低，市帳率(PB)就合理，如果可以保持盈利增速，中長線投資價值會較大，如果睇短線，AH股價差會係美格智能喺香港上市後嘅上升關鍵。
