【Now財經台】截至早上11時止，1小時內《彭博》搜尋量最多港股，依次為騰訊控股(00700)、遠東宏信(03360)、金蝶國際(00268)、中國神華(01088)及美圖公司(01357)。
金蝶及美圖基本上已轉型為SaaS軟件股，外圍嘅SaaS股如Salesforce、Adobe急跌，原因係人工智能(AI)初創公司Anthropic發布咗1款主動式AI代理工具，可以自動執行合約審查及法律簡報等任務，令軟件股再受壓，Anthropic嘅AI代理工具係咪真係會衝擊軟件股嘅商業模式？
資深證券分析師彭偉新指，對一般個人用家影響較大，對度身訂造嘅高端用戶就冇乜影響，主要睇返公司提供嘅服務，到底係針對專業用家，還是一般用戶，始終AI Agent只係可以寫簡單嘢嘅一般性用具，要求更專業仍要交比有經驗人士撰寫。
Castor又話，依家軟件股進入波動期，每當有消息傳出，唔少投資者就會先行食糊離場，呢種憂慮好容易推低股價，若同一時間好多投資者離場，股價就會顯著受壓，相信最後要睇B端用戶會唔會留低。
