【Now財經台】截至早上11時止，過去1小時內《彭博》搜尋量最多港股，依次為騰訊控股(00700)、快手(01024)、中國移動(00941)、英矽智能(03696)、泡泡瑪特(09992)。
英矽智能上市剛「滿月」，保薦人摩根士丹利出報告唱好，首次叫增持，目標價睇74元，雖然公司仍蝕緊錢，但一直同海外藥企簽協議及收里程碑付款，股價今日(3日)一度勁升14%，高見68.7元，創新高，嚟緊係咪可以繼續憧憬？
富途證券高級分析師馮文慧指，人工智能(AI)加藥物研發嘅概念新穎，亦係大勢所趨，集團聲稱可以將藥物研發期縮短至年半之內，除可以令更多人受惠，創新藥物亦可提早推出市場，令商業化成功及扭虧為盈嘅機會增加，所以唔少大行睇好英矽智能。
Anna又指，集團喺AI加藥物研發雙引擎帶動下，扭虧為盈嘅空間會慢慢出現，一旦實現盈利，公司估值有好大重估空間，現階段可先留意市銷率(PS)，若收入擴展或扭虧為盈，就可以跟同業比較市盈率(PE)，睇下有冇進一步向上空間。
