【Now財經台】截至早上11時止，過去1小時內《彭博》搜尋量最多港股，依次為金沙中國(01928)、融創中國(01918)、銀河娛樂(00027)、碧桂園(02007)、小米集團(01810)。
金沙今朝(29日)開市前出咗業績，集團去年第4季收入按年跌10%，拖累股價一度瀉近10%，低見17元，係早段表現最差藍籌之一，點睇呢份業績，係咪令市場好失望？
方德證券研究部分析師李浩然指，澳門去年12月賭收逾208億澳門元，雖然按年增長逾14%，但仍低過預期，金沙Topline收入增長同澳門賭收差唔多，但最令市場失望係，經調整幸運因素(Lucky-adjusted)EBITDA按季倒退3%，經調整幸運因素EBITDA利潤率跌2.6%，低過市場預期，亦係疫情以來最低水平。
佢又話，金沙嘅收入結構偏向VIP，但VIP對毛利率嘅貢獻偏低，所以市場初步反應較差係正常，亦令市場對派息嘅疑慮增加。
