【Now財經台】截至早上11時止，過去1小時內《彭博》用戶搜尋量最多港股，依次為新鴻基地產(00016)、領展房產基金(00823)、紫金礦業(02899)、老鋪黃金(06181)、長和(00001)。
本地地產股近日強勢，其中，新地股價更創新高，雖然樓市有回暖跡象，但新地股價喺短時間內急升，仲值唔值得高追？
富昌證券聯席董事譚朗蔚表示，依家有2大因素左右本地地產股表現，首先係息口，雖然全球央行再大幅減息空間有限，但估計低息環境仍會維持一段時間，有利資產價格。其次係本港樓市基本面，亦係最關鍵嘅因素，睇返樓價、成交量以至活躍度等數據，樓市去年已明顯回暖，刺激本地地產股炒上，佢相信，今輪會係一個較長期嘅升浪，尤其喺發展商開新盤、投地及推盤時，呢啲消息將成為股價短線催化劑。
不過，Stevan提醒，雖然新地股價今日(26日)一度大升6%，高見121.4元，雖然依家處於上升周期，但唔代表股價只升不跌，若股價去到超買水平時，唔建議高追，又認為可以等股價落返110元水平再部署，因為防守性會較強。
