【Now財經台】網易(09999)旗下遊戲《燕雲十六聲》周年版本上周六(2025年12月27日)上線，玩家反應唔錯，帶挈網易股價技術上出現突破，後市有冇機會挑戰去年9月高位，即240元樓上？雖然《燕雲十六聲》中國版已上線1年，熱度可能會稍為減退，但加咗新玩法及內容後，會唔會變成新增長引擎？
王道資本及家族資產管理執行董事黃敏碩指，要挑戰去年9月高位要睇有冇新資金流入，例如有冇多啲北水，雖然技術走勢有突破，但成交唔算多，若睇好股價向上，短期可以先睇240元呢個阻力。
Michael又話，依家《燕雲十六聲》好受歡迎，玩家忠誠度又高，未來要留意遊戲更新情況。此外，網易旗下《第五人格》、《率土之濱》都有新模式及聯動，相對於騰訊控股(00700)，市場認為網易更主力做遊戲業務，而兩家公司旗下遊戲熱度及吸引力其實都唔同，對網易嚟講算係一個正面因素。
