【Now財經台】截至早上11時止，過去1小時內《彭博》用戶搜尋量最多港股，依次為壁仞科技(06082)、華虹半導體(01347)、比亞迪股份(01211)、騰訊控股(00700)及中芯國際(00981)。
「國產GPU四小龍」之一壁仞今日(2日)首掛，開市報35.7元，較招股價19.6元，高逾82%，約10分鐘已升至暫時時高位，即42.88元，高逾1.2倍，但其後走勢轉弱。上市後股價會點走？
大華繼顯執行董事梁偉源指，人氣新股上市初期表現主要睇市場氣氛，以及有冇資金追入，睇返喺A股上市2隻「GPU四小龍」，即摩爾線程及沐曦股份，上市首日開高幾倍，壁仞今日高開唔夠1倍，其後股價走勢轉弱，低過今朝開市價，之後才略為喘定。
Steven認為，呢類股份起碼要觀察2個月，首先要睇摩爾線程及沐曦股份下星期會唔會繼續造好，而第4隻「GPU四小龍」燧源科技，計劃喺內地科創板上市嘅消息，有機會帶動另外「3小龍」股價，其次要睇整個大市氣氛，若晶片及人工智能(AI)相關股仍然係焦點，壁仞股價應該可以守住30至33元水平。
