【Now財經台】截至早上11時止，過去1小時內《彭博》用戶搜尋量最多港股，依次為紫金黃金國際(02259)、萬科企業(02202)、海豐國際(01308)、騰訊控股(00700)及泡泡瑪特(09992)。
國際金價回落至每盎司4300美元樓下，市場依家等緊美國嘅非農及零售數據，點睇金價喺數據出爐前回套？
富途證券高級分析師馮文慧指，金礦股昨日(15日)升得唔錯，或受唔同消息影響，例如將公布嘅美國經濟數據，以及日本好大機會加息。金礦股今日(16日)出現較大調整，原因係好多機構會喺年底進行Rebalancing，而金價今年已累積唔少升幅，相信年底前Rebalancing完結將令價格波動。
Anna又話，隨著外圍市況不明朗，以及美國聯儲局下任主席人選嘅不確定性，資金或會重新關注金礦股。佢直言，之前累計升幅太多以及市場「買消息、賣事實」 (Buy the rumor, sell the fact)，令金價喺結算期間喺高位整固，加上美國減息有「去美元」趨勢，有利黃金相關股表現，又建議投資者做中長線部署。
