【Now財經台】內地豉油「一哥」海天味業(03288)計劃喺12月18日嘅董事會會議，除審議未來3年股東回報規劃外，更會討論派發特別股息，海天股價今日(9日)一度逆市升2.5%，高見32.6元，海天今年中期業績都有派息，股息率唔夠1厘，海天A股股息率就近3厘，點睇集團未來派息政策？
元宇證券大中華區股票投資總監趙晞文相信，海天派息有一定上調空間，集團亦喺A股上市，過去兩年，中央都鼓勵企業透過派息回饋小股東，雖然特別息係一次性，但可以大幅提高今年派息比率。佢又話，大股東就更關注未來3年嘅派息規劃，海天作為一隻消費股，若業績穩定又兼顧到派息，會大大提升股份吸引力。
