【Now財經台】內地6大部委近日表明要再谷消費，仲要將消費賽道嘅潮玩、動漫等納入興趣消費支持範圍，泡泡瑪特(09992)股價之前表現好差，近日明顯轉強，係咪同呢啲消息有關？市場對集團嘅估值會唔會再上調？
紅蟻資本投資總監李澤銘指，依家主要靠氣氛推動，由於潮玩溢價及毛利率都較高，所以唔存在「內捲」或競爭，關鍵反而係需求，市場接受程度有幾高、願意畀幾多溢價買呢啲公仔，呢方面係要靠做市場推廣，唔係靠政策或政府。
Alan又話，由於唔知道泡泡瑪特嘅產品可以流行幾耐，而暫時仍未有產品同Labubu有相同價值，依家市場留意緊呢個IP老化後，有冇新品牌接力。佢續指，短期嚟講，泡泡瑪特股價係有較大反彈潛力，甚至可以上返50天線，甚至更高水平，但中長線未必可以再吸引到投資者衝入去。
