【Now財經台】市監總局規範內地電商平台「雙11」期間促銷及價格行為，雖然阿里巴巴(09988)將活動延長，但今年「雙11」氣氛似乎唔太熾熱，阿里股價昨日(12日)失守50天線，即160元水平，今朝(13日)一度跌逾2%，低見153.3元。想部署PUT輪，擺位有咩要注意？唔少資金部署價外約10%產品，槓桿3至5倍，係咪可以博到到價嘅爆發力？
中信證券國際股權衍生品銷售聯席董事李佳原指，若依家睇淡阿里，唔建議揀行使價太遠嘅PUT，就算股價再跌10%，140元仍然係重要支持位。
佢又話，阿里股價已自高位回落唔少，投資者可以留意價外10%至15%，短中期嘅PUT，槓桿都唔錯。
