【Now財經台】恒生指數今日(17日)午後愈跌愈多，一度瀉逾700點，失守25200點，不過，翰森製藥(03692)曾逆市升逾5%，高見37.58元，係少有可以逆市升嘅藍籌。集團今日開市前公布新藥物授權，並已收到首筆授權費8000萬美元，預期日後里程碑付款高達14.5億美元，下半年業績係咪似乎已經有保證？翰森近兩年每年都有1至2單藥物授權，呢個勢頭可唔可持續？
紅蟻資本投資總監李澤銘指，藥物授權對翰森業績有好大幫助，尤其收入增長，因為呢類收入基本上唔會有額外支出，屬於純利收入，加上會隨著研發進度獲得里程碑收入，所以投資者更關注早期授權嘅藥嘅後續收入。
Alan又話，翰森依家有唔少藥喺臨床1、2期階段，藥廠通常喺第2期末段見到新藥潛力就會抛出橄欖枝，所以相信翰森可以保持呢個授權趨勢。
