【Now財經台】內地龍頭車企比亞迪股份(01211)銷量超越美國同業Tesla一段時間，不過，Tesla上季純電動車交付量創新高，達49.7萬架，令兩家公司上季銷量差距收窄，Tesla係咪可以繼續急起直追？
富途證券首席分析師譚智樂指，Tesla第3季銷量飆升係因為美國電動車優惠稅務就快到期，好多人趕買車刺激銷量，如果撇除呢啲一次性因素，兩家公司今年全球銷量，比亞迪仍然跑贏Tesla。
不過，Arnold認為，比亞迪嘅情況令人擔心，因為Tesla發布新型號Model Y L後，喺內地賣得好好，市佔率亦有所提升，暫時未知其他地區係咪都有相同情況。佢又指，比亞迪混能車銷售增長開始大幅放緩，按年甚至出現倒退趨勢，原因係混能車需求下降，市場對純電動車受落，尤其Tesla推出更快捷嘅充電技術後。
