【now.com財經】早前，市傳阿里巴巴(09988)掟70億元，想向文華東方購入銅鑼灣甲級商廈「港島壹號中心」，最頂嗰13層樓面，當時已有人估計阿里係買嚟自用。瑞銀最新指，如果呢單deal真係落實，九龍倉置業(01997)可能成為輸家。
瑞銀最新出咗報告，指阿里依家係九置旗下銅鑼灣時代廣場嘅租客，租用10層office，涉及17萬平方呎樓面，一旦阿里搬走，時代廣場空置率就會由現時約10%，再升16個百分點，如果冇新租客「接手」，若以呎租54元計，九置每年就少咗過億租金收入，相當於去年盈利約1%。
九置股價今日(3日)向下，一度低見22.26元，跌1.6%，暫時成交逾2800萬元。
