【Now財經台】截至早上11時止，1小時內《彭博》用戶關注度上升最多全球股票，依次為快手(01024)、紫金黃金國際(02259)、中芯國際(00981)、泡泡瑪特(09992)及貝殼(02423)。
快手股價今日(2日)高開近3%後，升幅一度擴大至逾8%，高見91.5元，升上3年高位，市場繼續睇好集團旗下「可靈AI」短片生成平台，單計第2季已帶嚟逾2.5億人仔收入，快手未來增長空間係咪好大？OpenAI推出新人工智能(AI)模型Sora 2.0，係一個生成短影片嘅App，對「可靈AI」有冇威脅？
香港股票分析師協會副主席曾永堅指，快手喺內地同業中表現突出，自「可靈AI」推出以來，睇到平台嘅影片流量及實際收益增長都比市場預期快，再配合快手嘅「出海」戰略，不論部署及執行都比預期優勝，相信集團短期可受惠於由AI帶動嘅估值重估。
Jasper又話，雖然OpenAI推出類似產品，但睇返行業發展空間，相信可以容納多過1個新競爭對手，唔會有太大衝突。股價方面，快手有足夠動力突破100元關口，下個阻力睇108元水平。
