【Now財經台】亞信科技(01675)昨日(24日)收市後公布同阿里巴巴(09988)達成合作協議，股價今日(25日)高開逾8%後，升幅一度輕微擴大至9%，高見12.88元，升上2個月高位，但其後走勢逆轉，升幅完全「化灰」，成交金額激增至逾4億元，成交股數較過去100日同時段平均增7倍。
亞信科技係信息技術產品及服務提供商，業務涉及5G、雲計算、大數據、人工智能(AI)等，集團今次跟阿里雲合作，成為阿里雲計算項目交付能力中心。
股價方面，亞信科技股價今日升穿保歷加通道頂，但高位獲利盤湧現，今日高開低走，出現1支大陰燭，其實股價自今年2月開始，每次迫近13元關口就有阻力，睇下今次會唔會歷史重演，亞信科技股價今年已累升約80%，資金開始獲利亦好正常。
