【Now財經台】美國減息預期升溫，帶挈金價向上，但似乎唔係所有金飾股都受惠金價上升。周六福(06168)依家有逾3800家分店，當中只有約20%係自營店，主攻下沉市場，即三、四線城市及年輕客群，如果金價升產品都要上調價格，係咪會削弱目標客群消費力？相對同業，周六福毛利率最低，點解會出現呢個情況？
亨達財富管理董事總經理姚浩然指，一般而言，金飾行業嘅毛利率會跟隨金價上升，因為售價比入貨價高，但周六福目標客群係年輕人，佢哋購買力較弱，當金價上升就會削弱佢哋嘅消費意欲，繼而拖低銷量。睇返周六福上半年業績，收入增速曾因金價上升而放緩。
佢又指，周六福毛利率跑輸同業係預料之內，但同經營能力強弱冇關，周六福採用加盟店模式，有助業務快速增長，但亦會攤薄利潤，除非周六福提升自營店佔比，否則，毛利率會繼續低過同業。
