【Now財經台】截至早上11時止，1小時內《彭博》搜尋量最多港股，依次為百濟神州(06160)、MONGOL MINING (00975)、阿里健康(00241)、新世界發展(00017)及比亞迪股份(01211)。
百濟神州股價今早(2日)出現突破，一度勁升逾9%，高見212.4元，而今年以來已累升87%，雖然升咗咁多，但大行普遍繼續睇好，並上調目標價，想入市嘅投資者應該點部署？
富途證券首席分析師譚智樂表示，創新藥板塊估值部分開始貴，雖然有大行調升相關股份目標價，但實際上同現價差唔多，建議投資者用分注收窄策略部署，即使高位有調整，仍有操作空間。
Arnold又話，創新藥及醫藥股都係市場目前炒作主題，會有資金繼續追捧，尤其係平安好醫生(01833)、阿里健康呢類線上醫療股，營運狀況商業模式變得清晰，有能力上試更高水平，有貨唔使急於食糊，可以繼續揸下先。
